Opwindende oggend

Dis presies wat vanoggend was. 'n Opwindende oggend.

Gisteraand het ons mos bitter min geslaap en manlief en sy games het eers na middernag die eerste keer gaan slaap. Vanoggend 6uur toe is ons wakker en sien manlief 'n sms op sy foon van sy suster af. Sonder die kinders in die huis, lê ons gewoonlik tot so voor 7 nog in die bed, staan op en maak koffie en trek aan en dan is ons nog steeds baie vroeg by die werk. Die sms sê toe dat sy suster en haar man het middernag in die dorp aangekom en het toe nie slaapplek gehad nie en toe slaap hulle maar voor die kerk in die dorp. Manlief bel toe en hoor hulle sit by die dam in die dorp en ons bly reg oorkant die dam. Kyk by die venster uit en sowaar, daar staan die geel golf onder die boom.

Ons is toe 6uur uit die bed uit en manlief gaan koop toe gou melk en gaan haal hulle (want hulle weet nie waar ons bly nie) en hulle kom laai toe hulle kar by ons plek uit. Sien, hulle trek van Pretoria af weer terug Nelspruit toe en die plek waar hulle sou intrek het die verhuurders nou skielik aan ander mense gaan staan en uitverhuur en nou sit hulle sonder heenkome.

Hulle het toe hulle pos uit die posbus gaan uithaal en daar was toe twee verdagte pakkies daarin wat hulle toe oopgemaak het en wat hulle toe nou vir ons kom wys. Dis snaaks verpak, kom van Madrid af en daar is 'n briefie binne in wat lyk of dit in Portugees geskryf is en wat ons nie 'n woord van verstaan nie. Wat nog snaakser is, is dat binne in elkeen van die twee pakkies is daar 'n klein beursie. Die beursie se twee ritssluiters is vasgegom en mens moet dit uitmekaar skeur om dit oop te kry. Binne in is daar 'n toegedraaide papiertjie en as jy hom oopdraai is daar 'n toegedraaide papiertjie weer binne in. Binne in die tweede een is daar wit poeier. Aan die kantsakkies is daar twee "bolletjies". Met "bolletjies" bedoel ek nou dis 'n leer dingetjie wat toegewerk is met dik gare. En met die oopsny daarvan, kry jy weer twee stukke opgevoude papier en binne in die papier is daar ysterballetjies en houtstukkies, grassies, takkies, saadjies en dies meer. Dit lyk nie goed nie. Ek is toe by die werk afgelaai (en is nog steeds vroeg by die werk) en manlief vat die goed toe polisie toe. Hulle weet toe nie wat dit is nie en sal dit stuur vir forensiese toetse. Manlief hou egter 'n afskrif van die brief wat hy later die dag vir 'n portugese vrou vat om te sien of dit wel in Portugees geskryf is en om uit te vind wat daarin staan. Al wat in die brief toe staan is dat dit een of ander moetie of iets is en die persoon aan wie dit gestuur is (wie se naam nie genoem word nie) moet die goed onder haar matras en onder haar mat strooi en die naam "Sandra" uitroep terwyl sy dit doen en een of ander man mag nie daarvan weet nie en dis al.

Sjoe, sal nogals graag wou weet waarvoor dit was...